Snjómokstur á Akureyri

Snjómokstur er enn í fullum gangi eftir óveðrið sem geysaði í seinustu viku. Unnið var alla helgina og verður haldið áfram þangað til bærinn hefur verið hreinsaður að fullu, en má búast við að það taki nokkra daga til viðbótar. Einnig heldur áfram að bæta í snjóinn svo verkum seinkar með meiri ofankomu. Þetta kemur fram á vef Akureyrarbæjar.

Um 50 manns vinna nánast allan sólarhringinn að þessu verkefni og eru notuð til þess hátt í 40 snjóruðningstæki.

Unnið að því að moka allan þann snjó sem kom í óveðrinu.
Mynd: Akureyri.is

Hvar er búið að moka?

Þegar óveður eins og þetta gengur yfir miðast þjónustan við að halda helstu stofn-, tengibrautum, strætisvagnaleiðum og aðgengi að neyðarþjónustu eins opnu og kostur er.

Nú er búið að ryðja strætóleiðir og allar helstu götur og stíga milli hverfa. Þetta hefur eðlilega tekið tíma, enda var ástandið slæmt og á göngustígum voru skaflarnir sums staðar mun hærri en vélarnar sem voru notaðar til moksturs. Mokstursfólki ber saman um að snjórinn sé erfiður við að eiga, þykkur og harður, og hefur þurft að ryðja sumar af stærstu götum bæjarins nokkrum sinnum til að gera þær færar.

Hvað er framundan?

Allur tiltækur mannskapur var við mokstur um helgina og hefur verið að vinna við að hreinsa í öllum íbúðahverfum bæjarinns.

Þegar mokstur hefst inni í hverfum er unnið eftir því að reyna að hreinsa hjá sem flestum íbúum á sem stystum tíma. Almennt er byrjað á leiðum sem liggja að fjölbýlishúsum og getur þar af leiðandi tekið lengri tíma að komast í litlar eða fáfarnar einbýlishúsagötur. Þetta eru vinnureglur, en meta þarf aðstæður hverju sinni og getur ýmislegt haft áhrif, til dæmis það hvernig gengur að koma snjónum í burtu.

Komist var vel á veg að hreinsa bæinn um helgina. Þetta mun auðvitað allt koma á endanum. Tilefni er til að þakka íbúum fyrir að sýna ástandinu þolinmæði og eins er fólk hvatt til að sýna þeim sem sinna snjómokstri tillitssemi, moka af bílum svo þeir sjáist og færa þá eftir atvikum.

Í kortasjá Akureyrarbæjar eru upplýsingar um fyrirkomulag snjómokstur í bænum. Með því að haka í „Vetrarþjónusta“ í stikunni til hægri má til dæmis sjá hvaða leiðir njóta forgangs.

Má bjóða þér að deila þessari síðu?
  • 1
  •  
  •  
  •  
  •  
  •  
  •  
  •  
  •  
  •  
  •  
    1
    Share