Breyta á heimavist Þela­merk­ur­skóla í íbúðarhúsnæði.

Stefnt er að því á næstunni að breyta húsnæði við Laugaland á Þelamörk, sem áður var heimavist Þela­merk­ur­skóla, í íbúðarhúsnæði. Þetta kemur fram á vef Hörgársveitar.

Ásmund­ur Ein­ar Daðason, fé­lags- og barna­málaráðherra, og Snorri Finn­laugs­son, sveit­ar­stjóri í Hörgár­sveit, und­ir­rituðu 23. nóv. s.l. vilja­yf­ir­lýs­ingu þess efn­is en yf­ir­lýs­ing­in fel­ur í sér aðkomu stjórn­valda að hús­næðis­upp­bygg­ingu í Hörgár­sveit. 

Með því að breyta heimavistinni í íbúðarhúsnæði er hægt að fjölga leiguíbúðum í sveitarfélaginu. Mikið hefur verið um skort á húsnæðum í Hörgársveit og er það aðalega vegna nálægðar við Akureyrarbæ, þar sem mikill vöxtur hefur verið undanfarin ár.

Íbúðalána­sjóður veit­ir þriggja millj­óna króna þró­un­ar­styrk.

Íbúðalánasjóður mun einnig koma að verkefninu og hefur sjóðurinn ákveðið að veita sveitarfélaginu þriggja milljóna króna styrk til þróunar verkefnisins. Styrkurinn er veitt­ur sem hluti af sér­stöku til­rauna­verk­efni sjóðsins, sem snýr að því að örva hús­næðis­upp­bygg­ingu utan suðvest­ur­horns lands­ins og bregðast við erfiðu ástandi á hús­næðismarkaði, ekki hvað síst á lands­byggðinni.

„Að und­an­förnu hef­ur sams­kon­ar verk­efn­um verið ýtt úr vör víða á lands­byggðinni og eru fleiri í far­vatn­inu. Eft­ir langvar­andi stöðnun þykir mér afar ánægju­legt að fylgja þeim úr hlaði á hverj­um stað fyr­ir sig. Ég hef lagt ríka áherslu á að hús­næðis­skort­ur standi ekki at­vinnu­upp­bygg­ingu á lands­byggðinni fyr­ir þrif­um og bind von­ir við að þess­ar aðgerðir styrki at­vinnu­líf hring­inn í kring­um landið,“ er haft eft­ir Ásmundi Ein­ari í til­kynn­ingu.